2012年12月18日 星期二

今日去咗天神村

〔年近歲晚,好想做大事回顧(非關12/21,拜托),至少讓我記一下開心事啦,一日一則,直到一月一,排名不分次序先後輕重左中右……〕

真係創作力量同幻想,會嚇你一跳。

無想過去飲茶前可以到天神村一遊。好可愛呀可。算是領匯迴光返照之作,可惜在氣溫急降五度又陰雨綿綿的樂富,天神村,有少少寂寞,少少尷尬。

因為見證IQ博士全盛期的,應該都係七十後,細一點,大一點,都唔知邊個係則卷千平。但七十後,唔係要搵食就要湊仔,邊個得閒去樂富舉機影相呢?

Dr. Slump,鳥山明,幾咁八十年代,每個人物每個look都是80's經典,草菇的double cut,小茜的少女perm,山吹綠子的溫柔性感吊帶裙,連宇宙大王的colorful框太陽鏡,都好潮。

當然少不了這粉紅色的主角啦。其實成齣卡通無人定義過佢係乜,但一出場被小雲用樹枝拮拮拮大家就知係乜。什麼是含蓄?這就是含蓄。這幅相影得佢好上鏡,好似去咗六本木,可以和村上隆那些公仔媲美。

那些年,真係美夢如炸彈,開心的轟炸啊。