〔好耐冇見。〕
「度身訂書」到底係一項乜嘢服務？係一個配對App？係一個好Old School的書店每月精選服務？係一個「文學福袋」？定係一個尋找命中注定真命天書的超強大數據平台……？
通通，都唔好問我，我真係唔知。
老實講，起初我以為係衣香鬢影，行行企企飲杯嘢，一家三口影張相的撐閱讀撐文學之類的社交活動。
結果文學館好有誠意咁問︰「唔知方唔方便到府上拍攝直播？」
？？？？
理論上，平日晚上十點，我家就算未瞓，都已經沖完涼、落晒粧、換晒眼鏡……上網睇書自由活動時間正式開始。忽然要Facebook Live，都幾新鮮。
咁我哋又未必睡衣眼鏡出戰既。
但同大家一樣迷茫、好奇又期待，就肯定既。
阿仔應該會大講佢鍾情陳浩基背後的懷舊老餅基因與為什麼越無邏輯的人會越鍾意睇推理小說……
我應該會講吓我細細個已經想用文學賺錢的心願，其中包括「代寫情書」以及「把無人要的舊書包裝成千金難買萬中無一並索取天價」的以書為禮配對服務。
董生應該是真正的彩蛋，無從稽考，今朝問佢，佢仲係皺住眉咁話︰「咩呀……究竟今晚係做咩架……唉……」
正所謂，三人要守密，兩人得……
又或者，三人要搵笨，兩人得齋噏
總之感謝文學館非常有誠意的車馬費（況且移就車馬到寒舍的還是您們哪），今晚講文學soul mate會否講到靈魂出竅真係唔知，但疫情下見得幾多得幾多，能一齊玩下心理遊戲，見吓小樺，始終係一件好感恩既事。真的。
