先要多謝（大我唔夠一歲）的Hoiwood哥哥慷慨轉贈，痴心人為買票申請了DBS白金Eminent Card，只因一票難求。我話Eminent Card唔係要戶口長期有一百萬或者二千幾蚊年費才可以申請嗎？佢話，「係咩？」勁。
江湖規矩，不劇透啦。但劇情劇情，劇不可透，情有可抒。
入場不斷跟HW說，好緊張，好驚，好驚唔好笑。
講真，楝篤笑昇華到了藝術的話，藝術這回事，就是「今日有，聽日你未必會有﹗」
上次好笑，今次無人可保證好笑。好簡單啫。
我沒有想過有那麼多情懷嘢。講大膽講即興，有乜超越得過2014年場；講笑謔與自嘲，一定娛樂圈血肉史；講黑色，一定是冇炭用……
但這次看家本領盡出，咩叫當行本色——把老本食到出神入化，精妙絕倫，就不再是老本了︰
1. 畢竟是哲學出身，全晚不斷示範辯證法︰香港幾好都有/幾衰都有；黃金（華）年代人人懷愐，但無人真正想回去；我們從來的核心價值，就是無價值︰有容乃大，絕非耍嘴皮。
2.賑災︰其實就是小思老師常說的，從來無人教我們愛國，但災自然會賑。我們是如何失去賑災的藝術的？烏托邦主義當然就是這世界已無災可賑；現實主義當然是得悉捐款遭貪腐以後，人聰明了，自己災情自己救。超超超現實的主義是︰不再需要之一︰有無見過災民有錢過捐款人？無就收手吧。不再需要之二︰我冇感覺，唔想幫了。
3. 黃金（華）年代︰那種回到未來式的希望是正的，正於其實沒法；但真要回去「點錯相」、「唔關事既踎低」、影圈黑道，又有幾正呢？
4. 幻海奇情︰「勞碌半生，忙打拼，想係太平盛世做個小明星，贏咗有粒糖，一輸乜都無剩，光陰已……」臨別秋波、憑歌寄意，其實一響起auld lang syne 罐頭音樂我已喊，for the old times' sake，我們在黃子華中經歷了幾多成長、戀與失戀、結婚生仔、升職減薪，人生起跌。但為過去的好時光……第一次，棟篤笑，唔好問我有幾多個笑位，要問問我有幾多個喊位，或思考位。
仲有，唔好再估金盆浪口係咪真係最後一次，訊息已經好清楚，收山與否，不在子華神，在觀眾、在社會。如果我們繼續要尋找PK的故事，我們繼續真小家假正經，繼續不再介意「面斥不雅」……三十年前的「跟住去邊度」，終於會有答案——就是會昂然進入一個沒有楝篤笑的世界了。
仲仲有，亦無須再問子華神浪口之後係唔係去搵人仔了。其他我唔知，今次呢場，深圳以北既識笑，我——我——我覺得呢D人仔賺幾多都抵﹗但實情係，唔好話深圳以北大灣區乜乜物物，兩個世代香港人的笑（淚）點可能已經好唔同。
唔好嘈，俾佢抖下，for the old times' sake, 仲有25場。乖。
