之前信誓旦旦乜乜物物，所謂練跑，其實全憑即興。重點係，靚景哪裏停，我就哪裏停，所以跑過7.8K、6.9K、8.1K……就係無試過10K。1月Fun Run逼在眉睫，開學前夕，在備課、寫文、改文、睇新書之間，我選擇了回家前先把10K了結一次。
路線跟Fun Run當日有點不同，差不多小姐，無所謂啦，總之GPS話夠5K我即掉頭（剛好由大學火車站到新城市廣場呢），回到CU剛好10K，亦好準確。好久沒有晚上看城門河，雖未至於槳聲燈影，但也勾起不少回憶。垂釣者、踏單車的、跑步的、散步的，好像跟我唸中學時的面貌差不多。
不同的是那時未有Radiohead的Creep陪伴，真是jogging playlist的必備啊，唱到Chorus的She runs, runs, runs, runs, runs~~~~~~，一路上升，真是什麼撞牆期都要被粉碎掉。
雖然，成績麻麻，但我真係志在完成。但求當天可以個半鐘內，毫無難度返回嶺南場趕睇到頒獎典禮，就已經好開心。至於開學前一晚還可以如此練跑、懷舊、看人、看風景，好像從來未有。驚嗎？唔驚。有TK和KK做助教，開學，yo，駛乜驚。
